Mobil ziyarətçi masaüstü istifadəçi kimi davranmır
Sayta kompüterdən daxil olan istifadəçi ilə telefondan gələn istifadəçinin səbir həddi eyni olmur. Mobil istifadəçi əksər hallarda yoldadır, iş arasındadır, bir reklamdan keçib gəlib və qərar vermək üçün çox az vaxt ayırır. O, saytı araşdırmaqdan çox, tez başa düşmək istəyir. Əgər ilk ekranda nə təklif etdiyiniz, nə etməli olduğu və haraya klikləməli olduğu aydın görünmürsə, çıxış çox tez baş verir.
Azərbaycanda bu davranış xüsusilə Instagram reklamları və WhatsApp paylaşımı ilə gələn trafkidə daha açıq görünür. Məsələn, gözəllik salonu və ya kurs mərkəzi kampaniyasını storidə görən istifadəçi mobil sayta keçəndə eyni rahatlıq gözləyir. Əgər qarşısına ağır şəkillər, dolaşıq mətn və aşağıda gizlənmiş düymələr çıxırsa, maraq bir neçə saniyəyə sönür.
Sürət mobil optimizasiyanın birinci mərhələsidir
Mobil optimizasiyada ilk baxılmalı məsələ səhifənin nə qədər sürətli açılmasıdır. Çox vaxt şirkətlər gözəl banner, böyük şəkil və çox effektli giriş hissəsi istəyirlər. Amma bu vizual qərarlar düzgün idarə olunmasa, səhifə mobil internetdə ağırlaşır. İstifadəçi isə saytın niyə gec açıldığını analiz etmir, sadəcə geri qayıdır.
Restoran, klinika və ya xidmət şirkəti üçün bu itki birbaşa sorğu itkisi deməkdir. Çünki istifadəçi alternativi artıq cibində daşıyır. Mobil optimizasiyada şəkil sıxılması, lazımsız blokların azaldılması və əsas məzmunun ilk yüklənmədə görünməsi çox vacibdir. Sürət burada yalnız texniki göstərici deyil, kommersiya nəticəsidir.
Düymələr və əsas çağırışlar barmaqla istifadə üçün düşünülməlidir
Masaüstündə rahat görünən bir CTA düyməsi telefonda çox kiçik görünə bilər. Xüsusilə WhatsApp yazışmasından və ya Instagram reklamından keçən istifadəçi sizə tez yazmaq, zəng etmək və ya qeydiyyat formunu açmaq istəyir. Əgər düymə nazikdir, kənara sıxılıb və ya digər elementlərlə qarışırsa, klik ehtimalı aşağı düşür.
Mobil optimizasiyada düymə sadəcə gözəl görünməməlidir, rahat istifadə olunmalıdır. Onun ölçüsü, ətraf boşluğu, rəng kontrastı və yerləşimi istifadəçiyə "buradan davam et" hissini verməlidir. Bu, xüsusilə qısa qərar axınlarında çox önəmlidir. Məsələn, hüquq konsultasiyası və ya diş klinikası üçün ilk əlaqə düyməsi telefonda rahat görünməlidir ki, insan tərəddüd etmədən addım ata bilsin.
Mobil formalar nə qədər sadədirsə, nəticə bir o qədər yaxşı olur
Bir çox şirkət mobil sayta masaüstü formanın eyni versiyasını yerləşdirir. Uzun sahələr, əlavə suallar, açılan menyular və rahat olmayan inputlar istifadəçini yolda saxlamır. Mobil form doldurmaq kompüterdə yazmaq qədər rahat deyil, buna görə hər əlavə sahə kiçik maneəyə çevrilir.
Xüsusilə xidmət bizneslərində ilkin mərhələdə sadə forma daha yaxşı işləyir: ad, əlaqə nömrəsi və qısa qeyd kifayət edə bilər. Sonrakı detalları telefon danışığında almaq çox vaxt daha səmərəlidir. Bu yanaşma xüsusilə tikinti xidməti, kurs qeydiyyatı və ya tibbi konsultasiya kimi sahələrdə daha çox sorğu gətirir.
Mobile-first indexing və satış dönüşümü eyni istiqamətdə işləyir
Google artıq uzun müddətdir mobil versiyanı əsas siqnal kimi nəzərə alır. Yəni saytın telefonda necə göründüyü təkcə istifadəçiyə yox, axtarış sisteminə də mesaj verir. Əgər mobil versiyada məzmun natamamdır, struktur zəifdir və ya vacib hissələr gizlənir, bu yalnız UX problemi kimi qalmır.
Maraqlısı budur ki, Google-un istədiyi şeylə biznesin istədiyi şey çox vaxt üst-üstə düşür: sürətli yüklənən, rahat oxunan, düymələri düzgün görünən və forması sadə olan mobil sayt həm axtarış, həm də satış baxımından daha yaxşı işləyir. Ona görə mobil optimizasiya ayrıca kosmetik iş yox, həm SEO, həm reklam, həm də dönüşüm strategiyasının mərkəzi hissəsidir.
Növbəti addım
Responsiv Dizayn xidməti ilə davam edin
Əgər bu məqalədəki məntiqi tətbiq etmək istəyirsinizsə, uyğun xidmət səhifəsində icra yanaşmasına və əməkdaşlıq formatına baxa bilərsiniz.
